Квазимемлекеттік сектордың сатып алуларындағы демпинг

Демпингтік баға - бұл сатып алу туралы шарт жасасу мақсатында ұқсас тауарларға, жұмыстарға, көрсетілетін қызметтерге қолданылатын бағалармен салыстырғанда анық төмен болып табылатын тауарларға, жұмыстарға, көрсетілетін қызметтерге конкурсқа қатысушы ұсынған баға.

146. Егер әлеуетті өнім берушінің жұмыстарға арналған қатысуға өтінімнің бағасы техникалық-экономикалық негіздемеде (жобалау-сметалық құжаттаманы даярлау үшін) және Қазақстан Республикасының заңнамасына сәйкес сараптамадан өткен жобалау-сметалық құжаттамада (жалпы пайдаланудағы автомобиль жолдарын орташа жөндеуге арналған техникалық құжат) көрсетілген бағадан бес пайыздан астам төмен болған жағдайда, ол демпингтік болып танылады.
147. Егер әлеуетті өнім берушінің техникалық-экономикалық негіздемені, жобалау-сметалық (үлгілік жобалау-сметалық) және қала құрылысы жобалары құжаттаманы әзірлеу бойынша қатысуға өтінімнің бағасы "Құрылыстағы баға белгілеу бойынша нормативтік құжаттарды бекіту туралы" Қазақстан Республикасы Инвестициялар және даму министрінің Құрылыс және тұрғын үй коммуналдық шаруашылық істері комитеті төрағасының 2017 жылғы 14 қарашадағы № 249-НҚ бұйрығымен (Нормативтік құқықтық актілерді мемлекеттік тіркеу тізілімінде № 16073 болып тіркелген) бекітілген құрылыстағы баға белгілеу бойынша нормативтік құжаттарға сәйкес тапсырыс беруші есептеген бағадан он пайыздан астам төмен болған жағдайда, ол демпингтік болып танылады.
148. Әлеуетті өнім берушінің (аккредиттелген сараптама ұйымының) объектілер құрылысының жобаларына ведомстводан тыс кешенді сараптама жүргізу жөніндегі жұмыстарға арналған тендерге қатысу өтінімінің бағасы, егер ол "Объектілер құрылысының жобаларына ведомстводан тыс кешенді сараптама, сондай-ақ әртүрлі деңгейдегі аумақтардың қала құрылысын жоспарлау жобаларына кешенді қала құрылысы сараптамасын жүргізу жөніндегі жұмыстардың құнын айқындау қағидаларын бекіту туралы" Қазақстан Республикасы Ұлттық экономика министрінің міндетін атқарушының 2015 жылғы 21 желтоқсандағы № 780 бұйрығына сәйкес белгіленетін құнынан төмен болса, ол демпингтік болып танылады (Нормативтік құқықтық актілерді мемлекеттік тіркеу тізілімінде № 12681 болып тіркелген).
149. Егер әлеуетті өнім берушінің сәулет, қала құрылысы және құрылыс қызметі (техникалық және авторлық қадағалау, жобаны басқару) саласындағы инжинирингтік қызметтер көрсетуге арналған тендерлік өтінімнің бағасы «Қазақстан Республикасындағы сәулет, қала құрылысы және құрылыс қызметі туралы» Заңының 20-бабына сәйкес сәулет, қала құрылысы және құрылыс қызметі саласындағы уәкілетті орган бекіткен бағадан он пайыздан астамға төмен болған жағдайда, ол демпингтік болып танылады.
150. Әлеуетті өнім берушінің тауарларға, жұмыстарға (осы Қағидалардың 146, 147, 148-тармақтарында көзделген жұмыстарды қоспағанда), көрсетілетін қызметтерге (осы Қағидалардың 149-тармағында көзделген көрсетілетін қызметтерді қоспағанда) арналған тендерге қатысуға өтінімнің бағасы, егер ол тендерге бөлінген бағадан жиырма пайыздан астам төмен болған жағдайда, демпингтік болып танылады.
 
151. Әлеуетті өнім беруші шарттың орындалуын қамтамасыз етуге қосымша демпингтік деп танылмайтын, рұқсат етілетін ең төмен бағадан төмендетілген сомаға тең мөлшердегі соманы енгізу шартымен тауарларды, жұмыстарды, көрсетілетін қызметтерді сатып алу бойынша демпингтік баға ұсынуға жол беріледі.
152. Осы Қағидалардың 146-149-тармақтарында көзделген жағдайларда, демпингтік бағаларды ұсынуға жол берілмейді.